මහරගම පිළිකා රෝහල හෙවත් අපේක්ෂා රෝහලේ ප්රතිකාර ලබන රෝගීන්ට බාහිර පුද්ගලයන් විසින් කලක් තිස්සේ කරගෙන ගිය තැඹිලි ලබා දීමේ වැඩසටහන් අවලංගු කිරීමට රෝහල් පාලනාධිකාරිය පියවර ගෙන තිබේ.
ඒ වෙනුවට එලෙස ලබා දෙන පරිත්යාග රෝහල වෙත ලබා දී රෝගීන් වෙත සෞඛ්යාරක්ෂිතව ලබා දීමට කටයුතු කරන ලෙස අපේක්ෂා රෝහල් පාලනාධිකාරිය ඉල්ලීමක් කර ඇත.
දිවයිනේ විවිධ ප්රදේශවල පිරිස් සෑම දිනක ම පාහේ මෙසේ අපේක්ෂා රෝහලේ රෝගීන්ට තැඹිලි ලබා දීම සම්බන්ධ තොරතුරු සහ එසේ ලබා දීමට අවශ්ය තැඹිලි ඉල්ලා කරනු ලබන ආයාචනයන් ද පසුගිය කාලය පුරා ම සමාජ මාධ්යවල දැකගත හැකි විය.
අපේක්ෂා රෝහලේ පාලනාධිකාරිය ජූනි 01 වන දා සිට රෝගීන්ට තැඹිලි දාන ලබා දීම නැවැත්වීමට කටයුතු කර තිබේ.
ඒ සම්බන්ධව ජාතික පිළිකා ආයතනයේ අධ්යක්ෂ, විශේෂඥ වෛද්ය එම්.කේ. සම්පත් ඉන්දික කුමාරගේ අත්සනින් යුතුව නිකුත් කරන ලද නිවේදනයක සඳහන් කර ඇත්තේ, බාහිර පුද්ගලයන් විසින් තැඹිලි වතුර ලබා දීමේ ක්රියාවලිය නිරීක්ෂණය කිරීමෙන් අනතුරුව විශේෂඥ වෛද්යවරුන්, සියලු අංශ ප්රධානීන් හා රෝහල් කමිටුව සමග සාකච්ඡා කර මෙම ක්රියාවලිය නතර කිරීමට පියවර ගත් බව ය.
පරිත්යාගශීලීන්ට තැඹිලි ලබා දිය හැක්කේ කෙසේ ද?
ආහාර පනතට හා ස්වස්ථතා නියෝගවලට අනුකූලව සෞඛ්යාරක්ෂිත ලෙස මෙම ක්රියාවලිය සිදු නොවීම සහ ඉතා විශාල සහභාගීත්වයක් හරහා රෝහල තුළ අනාරක්ෂිතභාවයක් මතු වීම මෙන් ම නීති විරෝධී කටයුතුවල යෙදෙන පුද්ගල කණ්ඩායම් මෙම ක්රියාවලිය හා සම්බන්ධ බවට වාර්තා වන හෙයින් එම කරුණු ද සලකා බලා මෙම පියවර ගත් බව එම නිවේදනයේ සඳහන් කර ඇත.
රෝහල සඳහා දිනකට අවශ්ය කරනු ලබන තැඹිලි ගෙඩි සංඛ්යාව 100-200 ප්රමාණයක් දක්වා වන බව ඇස්තමේන්තුගත කර ඇති බවත් එම ප්රමාණය පරිත්යාගශීලීන්හට ආහාර ඇණවුම් නිලධාරී හරහා ප්රධාන මුළුතැන්ගෙයට ලබා දීමේ හැකියාව පවතින බව ද ජාතික පිළිකා ආයතනය නිකුත් කරන ලද නිවේදනයේ දැක්වේ.
